Xixón ta en fiestes

Del martes al miércoles que vien, Xixón celebra la so Selmana Grande. Conciertos, grupos folclóricos, bandes de gaites, fueos artificiales, la Danza Prima, la FIDMA..., son dalgunes de les munches posibilidaes qu'ufre la ciudá nestes xornaes festives.

El piragüista catalán Saúl Craviotto, oru olímpicu en Beijing y en Rio de Janeiro residente n'Asturies, va abrir la Selmana Grande cola llectura del pregón a les 21 hores na Plaza Mayor. L'austrialianu fíu d'emigrante Oskar Proy va cantar l'himnu del país y Víctor el 'Gijón de alma' nuna cita na que tamién va haber güecu pa los grupos folclóricos y que va finar cola gala del XVIII Festival Internacional de Bandes de Gaites Villa de Xixón.

La música siempre ye protagonist nes fiestes de la ciudá y esti añu los conciertos na sablera d'El Natahoyo van tar protagonizaos por Luz Casal (vienres), Warcry (sábadu), Maldita Nerea (domingu) y The Original Blues Brother Band (llunes), con hora de comienzu a les 23 hores. Na Plaza Mayor van tocar Sidonie (mañana) y António Zambujo (xueves), dambos a les 22 hores, y Pancho Varona nuna 'Noche sabinera' (vienres), Zenet (sábadu), Shirley Davis & The Silverbacks (domingu) y Pulso Captains y Pablo und Destruktion (llunes), toos ellos a les 21 hores.

Nueche los Fueos

El martes ye la Nueche los Fueos, viéspora del día grande de les fiestes. El llanzamientu va ser a la medianueche, nesta ocasión a cargu de la pirotéunica valenciana Ricardo Caballer, que va ufrir un espectáculu dedicáu al triple centenariu de Cuadonga.

La música va ponela Assia na sablera d'El Natahoyo dende les 22 hasta les 2 hores. Yá'l miércoles, Día de Begoña, va entamase la Danza Prima que pon el ramu a les fiestes a les 14 hores na sablera de San Llorienzu.