Xixón sal a la cai pa celebrar San Xuan

Yá ta too preparao pa celebrar San Xuan. La medianueche del 23 van prender fogueres per tol conceyu, cola instalada na sablera d’El Natahoyo, onde va haber actuaciones de bandes de gaites, como puntu central, pero enantes s’engalanen les fontes, dos tradiciones d’una xornada na que’l fueu y l’agua son protagonistes.

San Xuan celebra’l solsticiu de branu, que realmente ye nel pasu del día 20 al 21, pero la Ilesia católica treslladó esta celebración pagana pa coincidir con San Xuan Bautista (día 24). Esta tradición de raigaños celtes que recibía’l nome d’Alban Heruin fai cultu al sol al traviés del fueu y al agua, d’ehí el prendíu de fogueres y l’enramáu de fontes.

Families y vecinos entamen les sos fogueres, con actividaes en barrios como Mareo, onde hai una romería con Tekila, o La Camocha, y el Conceyu llevanta una de gran tamañu na sablera d’El Natahoyo, llugar onde se concentra más públicu. Al igual que nos años pasaos, nun va contar la folixa col conciertu tradicional de música folk, que se cambia nesta ocasión por una orquesta, Cayenna.

Sí va instalase esti San Xuan un escenariu, nel que van actuar les bandes de gaites Conceyu de Xixón (22.15 hores), Noega (22.45) y Villa de Xixón (23.15). Enantes, La Magüeta y Jovellanos van facer un pasucais pel paséu a les 21 y 21.30 hores, de manera respeutiva.

Los fueos artificiales van llanzase a les 23.50 hores, pa prender la foguera a la medianueche y facer una danza prima que l’agua que cayó l’añu pasáu torgó. Darréu, sobre les 00.15 hores, va entamar la verbena.

Actuaciones de grupos de baille

L’enramáu de les fontes por parte de grupos de baille va entamar a les 19 hores nel llavaderu de Deva por parte de la Escuela de Música Tradicional Trubiecu. A les 20 hores van engalanase la gran mayoría d’elles: en La Guía, Coros y Danzas del Real Grupo de Cultura Covadonga; en L’Arrionda de Llantones, Música y Baile Tradicional Excelsior; en Zarracina, l’Agrupación Folclórica Asturiana Los Xustos; en Trubia (Cenero), El Turruxón; na fonte de Pelayo, Andecha de Cultura Tradicional Na Señardá; na fonte de la plaza Clara Ferrer, Flor de Xaranzaina; en Begoña, Asociación Coros y Danzas Jovellanos; na Fábrica del Gas, Trebeyu; y nel Trole (Cabueñes), Xiringüelu.

Mentes, a les 20.30 hores, El Xolgoriu va tar presente na fonte de Laviada pa poner en práutica esta guapa tradición y baillar pal públicu presente.

Na semeya, fogueres l'añu pasáu n'El Natahoyo, onde costó prender la instalada de gran tamañu nel llugar pol agua que cayó pel día.