Xixón foi protagonista estos díes en Madrid como destín turísticu

El Grupo Logitravel entamó delles actividaes sobre'l conceyu, poniendo'l focu sobre manera na gastronomía y el FICXixón.

Xixón Turismu algamó un alcuerdu con esta axencia de viaxes pa desendolcar delles aiciones p’amosar en Madrid los munchos atractivos de Xixón. La primera entamóse nos cines Kinépolis, na Ciudad de la Imagen de Madrid, onde s’alluga la Logitravel Store y consistió , enantes de la estrena de la película nueva d'animación sobre 'La Familia Addams', d'un videu de la campaña 'Xixón tu lugar’, amás d'una presentación.

L'espaciu físicu de l'axencia Logitravel acoyó esta fin de selmana una preba de productos de la gastronomía asturiana, como quesos y dulces de la ruta 'Xixón llambión'. Tamién s'entamaron xuegos pa que les persones presentes pudieran conocer los atractivos del conceyu y los asistentes pudieron echar sidra de manera virtual o participar na alfombra collorada del Festival Internacional de Cine de Xixón (FICXixón).

La campaña completóse cola grabación el xueves del programa 'Paralelo20' de Radio Marca, que s'emitió'l sábadu. Ente los convidaos tuvieron Ángela Baños, direutora de Xixón Turismu; Alejandro Díaz-Castaño, direutor del FICXixón; y Noelia de Prado, cocinera y dueña de La Cuadra de Antón, una de les sidreríes participantes na Ruta de la Sidra Xixón.