Xixón entama'l procesu de desescalada dando prioridá a los peatones y les bicicletes

El corte d'un carril d'El Muro abre un periodu nuevu pa los xixoneses depués de seis selmanes de confinamientu. El llunes comienza la fase 0 de la desescalada y dende'l sábadu van permitise les salíes pa pasiar y facer deporte, periodu nel que peatones y ciclistes van tener preferencia, ampliándose los carriles-bici.

Dende güei'l tráficu pela avenida Rufo García Rendueles va circular pel carril más alloñado a la playa. D'esta forma, el Conceyu quier habilitar más espaciu pa los piatones de cara al entamu de la desescalada qu'echa andar el llunes, anque'l sábadu yá van permitise salíes a pasiar y prauticar deporte con condiciones que se van dar a conocer esta tarde.

Les bicicletes qu'empleguen El Muro van tener que facer usu siempre del carril-bici. Pa favorecer la movilidá van afitase carriles-bici en 29 cais y aveníes de la ciudá qu'amplíen los yá esistentes, conviviendo nesti casu col tráficu rodáu con una llende de velocidá máxima de 30 quilómetros per hora, cola intención de promover l'emplegu d'esti vehículu como métodu de tresporte.