¿Xixón Central?

El Conceyu estudia la posibilidá d'importar el modelu de Madrid p'amenorgar la polución.

Aurelio Martín, conceyal de Mediu Ambiente y Movilidá, presentó ayeri la Selmana Europea de la Movilidá, a la que se suma Xixón, que se celebra del llunes al domingu 22. Nella anunció que ta estudiando la creación d'una área de baxes emisiones con tráficu llendáu na zona centru de la ciudá, al estilu de 'Madrid Central'.

Aseguró qu'un 'Xixón Central' "ta enriba de la mesa” y recordó que podría venir impuestu nun futuru dende l'Alministración central. Esta midida incluyiríase na ordenanza de movilidá sostenible que pretende presentar ente setiembre y ochobre, anque ensin definir los aspeutos concretos de la mesma.