Xixón celebra San Xuan

Delles fogueres van quemar na medianueche del sábadu per tol conceyu. La más popular tien como sede la sablera d'El Natahoyo, qu'esti añu nun va contar con conciertu.

La celebración en San Xuan principia a les 21 hores col enramáu de la fonte de Pelayo por parte d’Andecha de Cultura Tradicional Na Señardá y va siguir na playa coles actuaciones de la Banda Gaites Noega (22.45 hores) y la Banda Gaites Villa de Xixón (23.15 hores).

A la medianueche, tres el prendíu de la foguera, va tener llugar la danza prima y el llanzamientu de fueos artificiales. Otros barrios de la ciudá tamién celebren esta nueche máxica como Ciares, Mareo, Cimavilla, Tremañes, Contrueces y Viesques.

Actividaes dende güei al martes

Con motivu de la festividá de San Xuan, el Conceyu entama tamién música y baille en dellos puntos de la ciudá. A les 18 hores d'esta tarde la Plaza Mayor acueye'l conciertu de fin de cursu de la Escuela de Música y Danza Tradicional Villa de Xixón.

Amás, van actuar les agrupaciones siguientes: Asociación Coros y Danzas Jovellanos (20 hores, Xardinos de la Reina), Agrupación Folclórica Asturiana Los Xustos (20 hores, plaza d'Italia), Grupo Folklórico Trebeyu (20 hores, Campu Valdés), Grupo de Coros y Danzas del Real Grupo de Cultura Covadonga (20.30 hores, plazuela San Miguel) y el Grupo Folklórico El Xolgoriu (20.30 hores, paséu de Begoña). Mentes, el domingu ye'l turnu de Coros y Danzas Flor de Xaranzaina (13 hores, plaza d'Italia) y del Grupo Folclórico La Alegría (19 hores, Xardinos de la Reina).

Los bailles van siguir el llunes con El Xolgoriu (20.30 hores, paséu de Begoña) y el martes con El Turruxón (20 hores, plaza d'Italia).