Xixón acueye la grabación de conciertos d'Ún de Grao y D'Urria pa 'Amosando'

|
Amosando con Ún de Grao y D'Urria

El ciclu 'Amosando', qu'ufre conciertos de calter íntimu de grupos y artistes asturianos pa promoción de los sos trabayos nuevos, torna a ufrir dos conciertos en Xixón, que se van grabar esti domingu. Tres L-R y Xaime Martínez llega'l turnu de D'Urria y d'Ún de Grao.

Les presentaciones d’estos discos son con un formatu amiestu de conciertu acústicu con aforu reducíu, programa de televisión y alderique, too ello retresmitíu per Internet pa que llegue a persones de tol mundu. Ún de Grao va interpretar cantares de 'Pelo segao', primer llarga duración d'esti veteranu artista de la escena folk onde reinterpreta pieces de tonada y d'otres músiques de raigañu asturianu pa empobinales hacia soníos propios del rock, del jazz o de la bossa nova.

Mentes, la banda de Ḷḷaciana vien a Xixón col so álbum de debut, 'En Ca Pla', con composiciones d'un llau y del otru del cordal, con lletres nes que'l cuartetu emplega'l paḷḷuezu. Les dos actuaciones van grabase'l domingu dende les 18.30 hores nos estudios de Javier Lueje n'El Natahoyo.

P'asistir como público la xente interesao ha d'inscribise nesti enllaz hasta güei. Les quinces persones afortunaes van salir d'un sortéu ente tolos pidimientos y van recibir mientres los conciertos cerveza Caleya y frixuelos d'Asturcilla.

Contador Estadistiques