Venti embarcaciones a vela fixeron parada en Xixón nel so camín hacia Santiago pel mar

Na nueche del xueves aportaron a Xixón venti embarcaciones participantes na II Travesía Navega el Camino (Sail the way), que pretende potenciar el Camín de Santiago pel mar. El vienres siguieron la so ruta cola intención de navegar hasta Cuideiru.

El domingu pasáu partieron dende Hondarribia dos decenes de barcos con unos 70 tripulantes, que fixeron nueche esta madrugada nel puertu xixonés Marina Yates. Divertia Xixón, col enfotu de sofitar estes iniciatives y fomentar esta forma nueva de realizar el Camín de Santiago, ufiertó un almuerzu d’acoyida pa tolos pelegrinos de la travesía y entregó un llibru promocional de la ciudá a cada embarcación.

Nes etapes vinientes van sumase embarcaciones nueves a la espedición. Asina, ta previsto que, a la fin, aporten a Santiago de Compostela’l xueves 112 tripulantes en 29 embarcaciones tres atracar el miércoles na población gallega de Muros.

Va namás unos meses que vien incluyida la modalidá 'a vela' na credencial oficial del pelegrín, que se suma a les clásiques a pie, a caballu o en bicicleta. L’entamu de la Travesía Navega el Camino por North Marinas, asociación de marines del norte d’España, tien como oxetivu dar a conocer esta forma antigua de pelegrinaxe, que yá se venía faciendo dende la dómina de bronce, onde se mercaba con estos metales ente les xentes del Arcu Cantábricu-Atlánticu.