Una incidencia de 154 y l’aumentu de casos lleva a declarar l’alerta naranxa por COVID-19

La Conseyería de Salú declaró l’alerta naranxa en Xixón pol aumentu progresivu de la incidencia de COVID-19 nel conceyu, que ye de 154 positivos de COVID-19 por cada 100.000 habitantes nos 14 díes últimos, superior a la media del país, de 122. Va aumentar la rigurosidá n'aplicación de les midíes de prevención, proteición y seguranza.

L’estáu d’alarma va tener un llargor de 14 díes, nos que, de momento, nun va haber más restricciones que les actuales. Esta figura, que’l Gobiernu estrenó a últimos d’agostu en cinco conceyos del oriente, pretende ser un toque d’atención a les instituciones llocales, sectores socioeconómicos y a la ciudadanía enantes de pasos más drásticos como un confinamientu perimetral.

Una Comisión de Siguimientu a la que se suma’l Conceyu va dir revisando la situación estes dos selmanes. L’alcaldesa Ana González afaló a los xixoneses a “ser más rigurosos” con toles midíes de prevención y proteición, y encamentó, al igual que’l Gobiernu, a crear burbuyes sociales de non más de seis contautos estrechos pa torgar l’espardimientu del virus.