Un pisu nel centru de Xixón de dos dormitorios nun baxa de 800 euros

El costu del alquiler nel centru de Xixón nun apara de xubir. La ciudá tien 1.464 viviendes turístiques qu’ufren 6.877 places, cuando nel 2015 había namás 1 de 5, una de les causes que lo espliquen.

La ufierta nel centru de Xixón de pisos de dos dormitorios y más de 60 metros cuadraos nun baxa de 800 euros. Nuna busca fecha por YeXixón nel portal inmobiliariu Idealista namás s'atoparon 4 a menos d’esi preciu, de los que 2 sólo s’arrienden de setiembre a xunu, esto ye, a estudiantes, teniendo éstos qu’abandonalu pel branu al reclamalu’l propietariu pa destinalu a alquiler turísticu.

El crecimientu del usu de viviendes como agospiu pa visitantes ye una de les causes que provoca esti aumentu del costu del alquiler, al amenorgar la ufierta. Nel 2015 en Xixón había una vivienda d’usu turísticu nel conceyu, que nel 2016 xubió a 3, nel 2017 a 72, nel 2018 a 280…, y que nel 2023 algamó la cifra de 1.464, a los qu’hai que sumar 78 viviendes vacacionales, según los datos aportaos la selmana pasada pola Sociedá Asturiana d'Estudios Económicos y Industriale (Sadei).

Namái en comparanza col 2022, cuando había rexistraos 1.112 pisos turísticos, l’aumentu foi del 31,65 por cientu. Un crecimientu escomanáu que’l Conceyu quier controlar, polo que decicidó en xineru una moratoria d’un añu pa la concesión de llicencies nueves nes zones más saturaes, esto ye, el centru, L'Arena, Cimavilla y El Carme.