Un 'Mar de Llingües' en Mercaplana
|
29 Avientu, 2017 por Redacción
Una vez más l'asturianu va tar presente en Mercaplana cola Oficina de Normalización Llingüística. Y esti añu la mar y les llingües van pintar muncho.
Los más mocos van poder dase un calón, conocer al Anguleru, averase al surf, pescar llingües o xugar colos barcos y los animalinos de la mar… Pa eso hai que buscar l'espaciu de la Oficina de Normalización Llingüística de Xixón nel Pabellón 4 del Recintu ferial Luis Adaro.
Actividaes permanentes
Arreblagando coles llingües
Un xuegu xigante pa conocer les distintes llingües y partes del cuerpu.
Subi a la fola del asturianu
Vas poder cañicate na nuestra tabla de surf y deprender sobre esti deporte.
Pesca de baxura
Un xuegu p’alcontrar mensaxes nes botelles de cada llingua.
Tocáu, ¡pero non fundíu!
Un xuegu pa sumar puntos metiendo boles en furacos nos barcos.
Mapa pirata
Xuegu nel que marcar ónde s’alcuentren les ayalgues perdíes.
L'anguleru
Vas poder sacar una semeya con esti personaxe que reparte regalos per Asturies.
Amás vas poder facer chapes y llaveros col diseñu venceyáu a la mar que más te preste.
