'Tierra sólo hay una', temática de la XXIV 'Semana del Aula Popular José Luis García Rúa'

Una mesa redonda, dos conferencies y un conciertu con un coloquiu al día siguiente conformen el programa d'esti añu.

L'Atenéu Obreru de Xixón, la Sociedá Cultural Xixonesa, l'Equipo de Teatro La Máscara y Radio Kras sofiten al Aula Popular José Luis García Rúa nel entamu de la XXIV 'Semana del Aula Popular José Luis García Rúa', que se celebra del llunes al vienres y que cuenta tamién cola collaboración de la Fundación Municipal de Cultura, Educación y Universidá Popular. Esta edición lleva'l nome de 'Tierra sólo hay una' y "busca dar respuestes a la emerxencia climática y a les diferentes opciones, resistencies y alternatives de los diversos movimientos ecoloxistes".

Toles actividaes van desendolcase nel Centru de Cultura Antiguu Institutu a les 19.30 hores, a esceición del recital 'Allez, allez', de Luisa y Cuco Pérez, que van interpretar cantares del exiliu republicanu'l miércoles a les 20.30 hores nel Teatru Xovellanos. Les entraes tán a la venta por 15 euros.

La mesa redonda 'Luchas locales' va abrir la selmana'l llunes. Paco Ramos, d'Ecoloxistes n'Aición, va moderar un actu nel que van participar representantes de la Plataforma Contra la Contaminación, de la Plataforma Un Pulmón pal Solarón y Carmen Delgado, d'Ecoloxistes n'Aición.

El martes, Marta Macias, estudiante de Periodismu y activista de Fridays for Future, va poner la conferencia 'Urgencia climática y luchas ecosociales', y el xueves va entamase un coloquiu sobre'l recital 'Allez, allez' coordináu pol Grupo Eduación Crítica Eleuterio Quintanilla. Va poner el ramu a esta actividá Jaime Vindel, doctor n'Historia del Arte, ecosocialista y investigador, cola charra '¿Ecosocialismo o barbarie? Análisis de la crisis civilizatoria e imaginación política para la transición ecosocial'.