Salú fai un llamáu a los veceros del Vaya Bull y del Bora-Bora por un biltu de COVID-19

Hasta'l momentu detectáronse 13 positivos.

La Conseyería de Salú fixo na tarde d'ayeri un llamamientu a los veceros del Vaya Bull y Bora-Bora, chigres d'alterne asitiaos nel polígonu industrial de Porceyo, qu'acudieren ente los días 10 y 26 de septiembre pa facer un estudiu ampliáu de contautos por mor d'un biltu de coronavirus SARS-CoV-2. Pa ello han de rellenar esti formulariu o llamar al númberu de teléfonu 984.10.00.51.

En menos de 24 hores, 24 pesones punxéronse en contautu coles autoridaes sanitaries, que van valorar la indicación de facer una PCR. Mientres tanto, tolos clientes d'estos llocales neses feches han de llendar la so actividá social y reforciar les midíes de prevención contra la COVID-19 pa torgar contaxos nuevos.