Retrasu na vía de Xove: el ministeriu da a les empreses cuatro meses y mediu más pa la presentación d’ufiertes

El 8 de setiembre yera la fecha marcada pa la presentación d’ufiertes pa optar a la llicitación de les obres de la reclamada vía de Xove. A poco más d’una selmana del plazu, el Ministeriu de Tresportes, Movilidá y Axenda Urbana amplió’l mesmu cuatro meses y mediu, anque asegura que l’entamu de les obres sigue marcáu pa xunu del 2024.

La complexidá téunica d’una construcción con un presupuestu base de llicitación de 285,7 millones de euros ye’l motivu espuestu dende la Direición Xeneral de Carreteres pa tomar esta decisión. El 24 de xineru ye la fecha nueva marcada pa presentar tola documentación y l’axudicación, enantes del 24 de mayu.

Magar los retrasos que va provocar, dende Madrid caltienen que les obres van arrancar en xunu, como taba previsto. Sicasí, dende’l Conceyu nun se negó esmolecimientu y enfadu por esta situación, que l’alcaldesa Carmen Moriyón definió como “una mui mala noticia”, recordando que se trata d’una cuestión de salú sacar los camiones de La Calzada.

Na imaxe, infografía en castellanu del Ministeriu de Tresportes, Movilidá y Axenda Urbana sobre l'actuación en Xove nel que nun se respeta la toponimia oficial.