Retómase'l mantenimientu y siega de parques y xardinos

Les condiciones nueves del estáu d’alarma por cuenta de la pandemia de COVID-19 permiten a EMULSA, que sigue coles xeres de hixenización, retomar el mantenimientu y siega de parques y xardinos del conceyu. Tamién s’abrió otra vuelta’l puntu llimpiu de Roces tres un mes colos cuatro que cuenta Xixón pesllaos.

De momento nun podemos disfrutalos, pero’l Conceyu de Xixón yá ta trabayando nos parques y xardinos pa cuando los ciudadanos podamos tornar a tomalos cuando pase esta situación. Trenta operarios de la Empresa Municipal de Servicios de Mediu Ambiente Urbanu de Xixón, SA (EMULSA) retomaron los llabores de siega depués de quince díes paraos al nun ser consideráu’l so caltenimientu un serviciu esencial.

La empresa municipal tamién reabrió’l puntu llimpiu de Roces, que llevaba peslláu dende l’entamu del estáu d’alarma. Los de Somió, La Calzada y Tremañes caltiénense ensin serviciu.

Hixenización

Lo que nun aparó en momentu nengún foron les xeres d'hixene urbana pa favorecer la eliminación de los posibles traces de virus, pa lo que ta activa una plantía de sesenta trabayadores qu’actúa nes zones de mayor afluencia, como los alrededores de supermercaos y tiendes d’alimentación, centros de salú, farmacies y residencies. Estos profesionales empleguen desinfestantes, como pue ser dilución agua y hipocloritu en proporciones que garanticen l’efeutu de 1000 ppm de cloru y, al empar, minimicen la corrosión de los equipos y les posibles consecuencias nel medioambiental urbanu.