Ramón Lluís Bande presenta 'Un tesoru y una tumba' en La Buena Letra

El llibru, editáu por Impronta, ye la tercer entrega del cuadernu o diariu del cineasta xixonés.

'Un tesoru y una tumba' ye la continuidá de 'Un home que cava' (Impronta, 2019) y '¡Templu, cabaña!' (Impronta, 2021), nos que Ramón Lluís Bande inclúi llectures, reflexones y porgüeyos de cada día, que cuasi siempre tienen que ver cola última película que ta rodando o cola próxima que ta armando. "Nes esmoliciones y nes propuestes de Bande nun ye posible dixebrar lo ético de lo estético; tampoco nesti casu, onde l’usu d’una distanciadora tercera persona axuda a quita-y tou engolamientu al discursu, que paez enfotáu n’afondar en suelu firme pa llantar les pilastres de la so obra cinematográfica sobre idees y presupuestos sólidos. La memoria ye’l material del que tán fechos los suaños d’esti autor, que nun persigue la oxetividá sinón el compromisu, y que quier más plantegar entrugues que buscar certeces o fabricar respuestes", apunten dende la editorial.

El xixonés va presentar esti títulu esta tarde a les 19.30 hores na llibrería La Buena Letra. Nel actu va caltener una conversación col tamién cineasta Diego Llorente.