'Pulgarina' n'asturianu lleva per primer vegada 'Escenines pa la Reciella' al Antiguu Institutu

El festival de Navidá de 'Reciella. Families pol Asturianu' sal per primer vegada del CP Xovellanos pa la presentación n'asturianu de 'Pulgarina' con un conciertu especial.

L'autora Alicia Álvarez va ser la protagonista del actu, al interpretar los siete temes que componen esti discu-llibru de La Fabriquina editada na so versión en llingua asturiana por Araz –empresa editora tamién de YeXixón.com–. “Yera una neña tan pequena que nun consiguía ver les coses con perspectiva…” ye la cita qu’abre ‘Pulgarina’, que fala d’una neña diminuta apesadumbrada pol so tamañu qu’entama un viaxe de descubrimientu personal onde nada ye lo que paez sinón sólo una cuestión de perspeutiva.

La cita va ser a les 19 hores d'esta tarde nel Centru de Cultura Antiguu Institutu. Darréu, 'Escenines pa la Reciella' va continuar con trés activididaes teatrales: ‘Retalinos’, d’Olga Cuervo y David Varela, va representase’l llunes a les 12 hores (Antiguu Institutu); ‘Una casa’, d’Higiénico Papel, el día siguiente a les 19 hores (CP Xovellanos); y ‘Runa’, de Nun Tris, el miércoles a les 19 hores (CP Xovellanos).