Preséntase 'Una maleta enllena recortes'

Esti llibru repasa los 45 años d'historia del grupu de teatru Telón de Fondo.

Nel tardofranquismu, más concretamente nel 1973, ye cuando naz esta agrupación na factoría de Xixón d'Ensidesa, lo que la convierte na formación independiente más veterana de la escena asturiana. Una trayeutoria amplia y esitosa, cola llingua asturiana como protagonista, que merez quedar resumía en 'Una maleta enllena recortes', llibru homenaxe a Telón de Fondo que va presentase mañana nel Atenéu Obreru de Xixón.

La obra consiste nun "percorríu gráficu poles obres montaes pol grupu nestos 45 años y poles crítiques y reseñes más importantes. Un resume de la so actividá teatral, social y parateatral contaes en 110 páxines" al traviés de recortes de too esti tiempu en diarios y selmanarios. Samuel Castro, d'Ediciones Trabe, encargóse de la maquetación, mientres que la portada del llibru ye de la pintora llanisca Helena Toraño.

La presentación de 'Una maleta enllena recortes', títulu que xuega, amás de colos recortes de prensa, col "recorte nel presupuestu cultural nun país yá poco dau a lo cultural", va celebrase a les 19 hores con un actu conducíu por Inaciu Galán nel que van tomar parte Xulio Vigil, miembru fundador del grupu, y Lluis Antón González, autor de los testos del llibru. El saxofonista Gimi va poner la nota musical a la xornada que va zarrase con vinu del país y sidra brut.