Podemos y Izquierda Xunida celebren el Día d'Asturies na ciudá

Los conciertos de Dixebra y Spanta la Xente son los atractivos mayores de dambos eventos.

La Folixa Popular que Podemos venía celebrando pol Día d’Asturies nel Muséu del Pueblu d’Asturies va pasar esti añu a los terrenos lliberaos pol Plan de Víes, bautizáu polos xixoneses como’l Solarón. Una Nueche en Danza con Xeitu y Cantaruxare va servir d’avance esta nueche (21 hores), anque va haber actividá nel llugar dende les 17 hores.

Mañana, dende’l meudía, van entamase talleres y meses redondes, destacando l’actu políticu previstu a les 18.30 hores con Iñigo Errejón, diputáu de Xuníos Podemos; Noelia Vera, covocera de Xuníos Podemos nel Congresu; Xulio Ferreiro, alcalde d’A Coruña; la francesa Martine Billard, ex copresidenta del Parti de Gauche y coordinadora d’Ecoloxía de La France Insoumise; y los asturianos Daniel Ripa, Yolanda Huergo y Mario del Fueyo. Darréu va comenzar el Folixa Fest con Jerónimo Granda (19.30 hores), Tremenda Jauría (20.45 hores), Dixebra (22 hores) y DJ Populismo (00 hores).

Pela so parte, el Muséu del Pueblu d’Asturies ye’l llugar escoyíu por Izquierda Xunida (IX) pa entamar los sos actos pol Día d’Asturies. El comienzu ta previstu pa les 12.30 hores, col eventu ‘Asturias por la izquierda’ a les 13 hores como’l principal: un alderique de la periodista Xana Iglesias col escritor Xuan Bello y la diputada Concha Masa “sobre un futuru de progresu n’Asturies pa la mayoría social y trabayadora’.

Conciertos, una espicha popular, xuegos tradicionales y una presentación sobre la Wikipedia n’asturianu a cargu de Víctor Suárez (18 hores) van completar les actividaes, que van finar tres l’actuación de Spanta la Xente a les 19 hores.