Nueche d'Ánimes

Esti miércoles ye la Nueche d’Ánimes, una xornada mui presente na nuesa tradición anque anguaño contaminada pola so versión estauxunidense: Halloween. Pa esta fecha hai previstes delles actividaes en Xixón alredor d’esta folixa de raigón celta na que los espíritus de los muertos tornen al mundu de los mortales.

El Samhain o Nueche d’Ánimes, como se conoz n’Asturies, ye l’añu nuevu celta; el pasu del branu al iviernu, cuando la escuridá gana a la lluz. Poro trátase d’una fiesta de transición y d’apertura al otru mundu, yá que nesta fecha los celtes creíen que los espíritu de los muertos tornaben al mundu de los vivos.

Son munchos los rituales que se faen esta nueche y ente les tradiciones qu’entovía lleguen a la nuesa fecha ta l’afuracamientu de nabos, anque tamién de calabaces, que se solíen colocar nos cruces de camín nel pasáu. Pa conocer un poco más d’esta tradición recordamos esta crónica de la charra ‘El Día Difuntos na tradición asturiana’, entamada pola Lliga Celta d’Asturies, que punxo Alberto Álvarez Peña

¿Cómo celebres tu la Nueche d’Ánimes? Nesti reportaxe de ‘A la Gueta los Suaños’ tamién pues garrar delles idees.

Dalgunas de les actividaes pa estos díes:

• Dende’l día 27 el xixonés Xardín Botánicu Atlánticu vien entamando per sétimu añu consecutivu delles actividaes baxo’l nome de ‘Calabaces y Calaveres’, iniciativa dedicada a les tradiciones al rodiu’l Día Difuntos, con un ésitu grande de públicu, como amuesa que s’escosaren les entraes pa tolos talleres infantiles y pa los Alcuentros Inquietantes, qu’inclúin un amagüestu. Sí ye posible acudir a les sesiones Lleendes Asturianes de Difuntos previstes pa los díes 1, 3 y 4 de payares, con un preciu de 1,50 euros (imprescindible inscripción previa), o visitar la esposición de calabaces del Botánicu.
   
• Onde les piscines d’El Llano, l’Asociación Sociocultural La Serena celebra Samhain dende güei hasta’l xueves. La folixa de mañana va principiar a les 16 hores con pintacares y dellos talleres, pa siguir con actividaes pa neños y mayores qu’esti añu van centrase sobre manera nel Día de los Muertos mexicanu. A les 22.30 hores va celebrase una ceremonia de Nueche d’Ánimes, pa finar cola actuación de la orquesta Tekila y del DJ David Dee.