Música asturiana de dellos estilos va sonar en trés espacios de Xixón

Esta selmana va desenvolvese la mayor parte de la programación de los XI Alcuentros de Músiques Asturianes, que presente a los xixoneses “una representación de les músiques del país”. Trés conciertos, al que se va sumar un cuartu’l día 21, con propuestes pop, hip hop, jazz y folk.

La Fundación Municipal de Cultura, Educación y Universidá Popular, al traviés de la Oficina de Normalización Llingüística, entama esta iniciativa en collaboración col Taller de Músicos que va llegar a dellos espacios de la ciudá. La Ciudadela Celestino Solar acueye les dos primeres cites, esta tarde y mañana a les 19.30 hores, cola presencia de Silvia Quesada y Mostruu l’Horru, de manera respeutiva.

La cantante de Tinéu va tar acompañada por Alfredo González a los teclaos y por Silvia Gestido a la viola nesta actuación na que va interpretar cantares de los sos discos en solitarios. Mentes, el dúu de hip hop, col refuerzu del DJ Jotadejota va presentar el so primer trabayu, ‘Señales de fumu’.

El xueves va ser el turnu del jazz, nesti casu nel patiu del Centru de Cultura Antiguu Instititu, con Slum Suit, banda que nació en New York de la mano del gaiteru y saxofonista Carlos Casado. Anguaño, en formatu cuartetu xunto con Xaime Arias al pianu, Óscar Santos al baxu y Eva D. Toca a la batería, vien trabayando’l cancioneru popular asturianu.

Pa finar, coindiciendo col Día Européu de la Música, 21 de xunu, el tríu astur-andaluz de música folk Deira va tocar na cai, en Tomás y Valiente. El xixonés Gonzalo Llao al bouzouki y Juan Almaraz a la flauta irlandesa y Salvador Daza al violín asoleyaron recién el so primer trabayu, ‘Alba’.