Movimientu nuevu pa salvar la ZALIA: el Conseyu de Gobiernu aprueba l’ampliación de capital

17 años depués de la creación de la Zona d’Actividaes Loxístiques y Industriales d’Asturies (ZALIA) esti polígonu ensin actividá recibe a un salvavides nuevu. Un Conseyu de Gobiernu convocáu de manera estraordinariu aprobó un proyeutu de llei qu’autoriza una ampliación de capital que busca garantizar el so futuru y solvencia.

El siguiente pasu ye llevar el proyeutu normativu a la Xunta Xeneral en llectura única pal so alderique y votación. Cola so aprobación definitiva’l Gobiernu ampliaría la so posición mayoritaria al convertir la importante deuda que tien con él la empresa pública, cuasi 80 millones, n’aiciones.

Ésta creóse polos creitos que-y foi dando, al igual qu’otros propietarios, dende l’añu 2014 pa salvar una operación que se vendió como un motor pa los puertos de Xixón y Avilés y pa la creación d’emplegu, llegando a falar de 1.000 puestos de trabayu. Creada nel 2005 magar la amplia respuesta vecinal, sobre manera de los habitantes de San Andrés de los Tacones, nunca entró n’actividá y namái s’urbanizó una parte del proyeutu.

El Gobiernu cuenta anguaño con un 40 por cientu del capital, pol 30 de l’Autoridá Portuaria de Xixón, el 15 de l’Autoridá Portuaria d’Avilés, el 10 del Conceyu de Xixón y el 5 del Conceyu d’Avilés. Cola ampliación pasa a controlar más del 80 por cientu de la entidá.

Participación de Sepides

Esti movimientu pretender garantizar el futuru y la solvencia de la ZALIA, facilitando que la sociedá pública estatal Sepides materialice’l compromisu alquiríu con Asturies pa collaborar na finalización de les obres d’urbanización y de construcción d’una subestación llétrica, agora pendientes, y entamar cola comercialización de les parceles.

Na imaxe, Barbón nel Conseyu de Gobiernu estraordinariu d'esta mañana, que se celebró de manera telemática. Semeya obra d'Armando Álvarez.