Más de 2.000 persones visitaron la esposición ‘Asturianes’, qu’entama una xira per escueles

El CP ‘Príncipe de Asturias’ ye’l primeru de los centros del conceyu en recibir los paneles de la esposición ‘Asturianes’, entamada a partir de la obra d’Alicia Álvarez con ilustraciones de María Ortiz. Un total de 2.297 persones visitaron la muestra, a los qu’hai que sumar los participantes nes conferencies, talleres y conciertos alredor de la mesma.

“Llenamos la charra sobre Les Cigarreres, la de Les Comadres cuasi tamién, y el patiu del Antiguu Institutu pal conciertu d’Alicia y Mar. Llueu completáronse toles places de los dos talleres, el de los fogones de María Luis García y el de los bodegones de Julia Alcayde”, rellata María Xosé Rodríguez López, responsable de la Oficina de Normalización Llingüística, al tiempu que recuerda “los más de 2.000 visitantes a la esposición”. Unes cifres importantes qu’asitien a esta muestra a partir de la obra asoleyada por La Fabriquina, editada na so versión n’asturianu por Araz, empresa editora tamién de Yexixon.com, ente les iniciatives más esitoses organizaes pol SNL na sala 3 xunto coles esposiciones sobre Margarita Salas o los 35 años de Dixebra.

Per dos meses, hasta’l llunes, tuvo abierta la muestra al públicu, que presentaba les ilustraciones d’Ortiz, con testos informativos sobre les venti muyeres y coleutivos que protagonicen ‘Asturianes’, asina como oxetos venceyaos a les protagonistes. “Cumplióse l’oxetivu, que coincide col de l’autora Alicia Álvarez y la ilustradora María Ortiz, de dar a conocer y visibilizar a estes muyeres referentes, un reconocimientu públicu a les que llucharon polos derechos llaborales de la muyer, como Les Cigarreres, o la defensa de la muyer, como la Tertulia Les Comadres”, espresa la responsable de la Oficina, que recuerda la collaboración de la Universidá Popular nel entamu de les actividaes.

Hasta final de cursu

La esposición ‘Asturianes’ sigue viva y va percorrer les escueles del conceyu hasta’l fin de cursu. Les primeres alumnes y alumnos en poder contemplar los diferentes paneles son los del CP ‘Príncipe de Asturias’, centru onde yá tán instalaos.