Martínez Testa y Gutiérrez Lueje ganen 'Xixón Fala en 3'

El primeru na estaya de Cultura Asturiana y la segunda, na de Temes de Divulgación.

El Xixón Fala en 3, concursu de creación nueva de la Oficina de Normalización Llingüística de Xixón que busca fomentar l’emplegu del asturianu sobre cualquier temática, yá conoz a los ganadores de la so primer edición tres el fallu del xuráu, que tuvo presidíu por Raquel Rodríguez Huergo, direutora de la Fundación Municipal de Cultura, Educación y Universidá Popular, y compuestu por Fernando Padilla, direutor xeneral de Planificación Llingüística y Normalización; Marta Mori, vicepresidenta de l’Academia de la Llingua Asturiana; Ramón d’Andrés, profesor titular del Departamentu de Filoloxía Española de la Universidá d’Uviéu; el periodista Próspero Morán; y María Xosé Rodríguez López, responsable de la Oficina de Normalización Llingüística, qu’actuó como secretaria. Tres emponderar la calidá y bayura de los temes presentaos, valoró tanto la calidá espositiva y la capacidá de síntesis como la calidá llingüística, la oratoria y la capacidá de comunicación de les persones participantes na esposición de trabayos mientres 3 minutos esautos fechu'l 15 d’avientu nel salón d’actos de la Escuela de Comerciu de Xixón.

Pablo Martínez Testa, con 'Ente lo animal y lo humano', resultó vencedor na estaya de Cultura Asturiana, finando como segundu clasificáu Inaciu Galán con 'Muyeres na lliteratura asturiana', y Sergio Buelga como terceru con 'Desaniciu del términu teatru costumista referencia prexuiciosa pa contra’l teatru popular'. Na de Temes de Divulgación ganó Claudia Gutiérrez Lueje, con 'Esquí de monte', siguida de Rubén Magadán, con 'Otru estáu del bienestar nun ye posible: una excepción nel capitalismu históricu', y Víctor Suárez, con 'Wikipedia: ¿ta’l conocimientu llibre y multillingüe en peligru?'.

Les recompenses foron de 900, 400 y 200 euros pa estos trés primeros clasificaos de cada estaya nesta primer edición del concursu, que destacó pola alta partipación y la calidá de les intervenciones.

Na imaxe, Gutiérrez Lueje. Semeya obra de Galán.