El II 'Xixón Fala en 3' va celebrase'l 14 d'avientu nel Antiguu Institutu

La Oficina de Normalización Llingüística de Xixón entama una edición nueva de 'Xixón Fala en 3' depués de la bona esperiencia del añu pasáu. Va celebrase'l 14 d'avientu nel Centru de Cultura Antiguu Institutu y va estrenar una estaya pa mozos de 14 a 18 años.

El concursu que nació pa fomentar l'usu del asturianu pa falar de cualquier temática tien continuidá esti 2019. Hasta'l 5 d'avientu ye posible inscribise, pa lo que ye necesario presentar la solicitú, formalizada d’alcuerdu con esti formulariu, nel Rexistru Electrónicu operativu les 24 hores del día, nel Rexistru de la Fundación Municipal de Cultura, Educación y Universidá Popular o na Rede Municipal d’Oficines d’Atención a la Ciudadanía del Conceyu de Xixón, amás de nos sitios de procedimientu alministrativu común de les alministraciones públiques.

El concursu divídese en dos estayes, la de Cultura y Realidá asturiana, onde van poder tratase temes d’antropoloxía, toponimia, baille, historia o sociollingüística, ente otros, y la de Divulgación, non necesariamente sobre asuntos asturianos o Asturies. Amás, estrénase la tercer categoría, destinada a moces y mozos d’ente 14 y 18 años, que pueden presentar temes tanto de cultura y realidá asturiana como de divulgación.

Los participantes van tener 3 minutos xustos pa esponer el tema presentáu, nun rexistru cultu, nel actu que va celebrase'l sábadu 14 a les 11 hores nel salón d'actos del Antiguu Institutu. El ganador de caúna de les trés estayes va recibir 600 euros de recompensa, mentes que la de los segundos y terceros va ser de 275 y 125, de manera respeutiva.

Semeya obra d'Inaciu Galán.