Manolo sustitúi a Isma al frente del Sporting B

|

El direutor de Mareo torna al bancu.

El Sporting fixo güei oficial la destitución d'Ismael Piñera 'Isma' como entrenador del filial depués de la mala racha de resultaos que lleva'l segundu equipu tres el salto de José Alberto al primer equipu en sustitución de Baraja. Foi na xornada 14 cuando l'ex central garró'l B colos roxiblancos quintos empataos a 23 puntos col Mirandés, cuartu, dexándolu agora decimoterceru con 32.

En total 9 puntos de 48 disputaos, un balance mui probe que dexa al equipu mui cerca de los puestos de peligru, qu'abre'l Real Unión, que suma 31 puntos, namái 2 menos. No que respeuta al descensu, la distancia ye de 3 puntos.

La derrota del sábadu col colista, la Cultural de Durango, por 1-2 nel tramu final en dos saques d'esquina depués de dir ganando tol partíu aceleró la decisión del conseyu d'alministración cola intención d'introducir un revulsivu que frene una cayida posible a Tercera. Dende yá garra les riendes del Sporting B Manuel Sánchez Murias 'Manolo', que va caltener l'equipu téunicu d'Isma.

D'esta forma, Manolo torna al bancu depués d'entrenar mientres nueve xornaes al primer equipu na temporada 2012-2013, momentu nel que'l so puestu ocupólu José Ramón Sandoval, pasando a ser direutor de la Escuela de Fútbol de Mareo en setiembre del 2013. Pela so parte, el yá ex entrenador del filial va siguir coles sos funciones na secretaría téunica del club.

 

Contador Estadistiques