L’UC Ceares yá tien el so himnu en versión asturiana

El ‘postreru en dineru, primeru en corazón’ yá va poder retumbar en La Cruz y en tola so redolada gracies a la versión n’asturianu del himnu del UC Ceares. Ésta grabóse en branu y pue sentila en YeXixón.com.

La composición del himnu del Ciares foi una de les primeres aiciones que la direutiva actual del club fixo depués de rescatar a la entidá d’una más que posible fusión o desaniciu cola intención de revitalizar l’afición nel barriu. Foi en branu del 2011 con lletra y música de Mar Álvarez y Pedro Vigil y interpretráu pola Banda de Música de Xixón, cantar que pronto caló ente los siguidores.

Cinco años depués, una demanda vieya de l’afición y una aspiración dende aquella de la propia direutiva, el contar cola versión n’asturianu del himnu, yá ye una realidá. Ésta ta disponible yá na rede y pronto va sonar pela megafonía de La Cruz, confirmando asina’l compromisu del Ciares cola normalización del idioma.