Los XVII Alcuentros de la Mocedá cola Llingua van celebrase “#DendeCasa”

El 21 d’abril habríen de celebrase los XVII Alcuentros de la Mocedá cola Llingua, xornada na que los escolinos de Secundaria de Llingua Asturiana celebren actividaes alredor del idioma nel Muséu del Pueblu d’Asturies. La pandemia actual de COVID-19 nun va poder con esta iniciativa, que va desendolcase "#DendeCasa" estos díes gracies a un xuegu virtual basáu nel modelu de cuartu d'escape.

“Nesta dómina d’aconceyamientos virtuales, vamos siguir percibiéndonos colos sentíos y col entendimientu, esto ye, alcontrándonos, anque seya al traviés de les pantalles”, apunten dende la Oficina de Normalización Llingüística de Xixón, organizadora de los alcuentros. P’abrir boca, esti llunes va compartir dellos videos de docentes encamentando a les moces y mozos a participar nos XVII Alcuentros de la Mocedá cola Llingua #DendeCasa.

Mañana va entamar un xuegu virtual, a mou de cuartu d’escape, de nome ‘Misteriu nel Muséu del Pueblu d’Asturies’: “Va un par d'años, nos XV Alcuentros, seis rapaces y cuatro rapazos, que se faen llamar ‘La Promoción Pantasma’, nun pudieron salir del Muséu del Pueblu d'Asturies a cuenta d'una falcatrúa d'unes criatures maldadoses… ¿Sedrá quien l’alumnáu d‘asturianu de Secundaria a lliberar a La Promoción? Pa ello, van tener que tar bien sollertes y contestar bien dalgunes entrugues sobre otres ediciones de los Alcuentros de la Mocedá cola Llingua”.

Los maestros de cada clase van sofitar a los escolinos pa descubrir el misteriu, xera que nun va ser fácil. Por esti motivu, el miércoles van ufrise delles pistes, bien de les veces de la mano de los protagonistes que participaron n’otres ediciones d’esta folixa educativa alredor de la llingua asturiana.