Los Reis Magos apuerten a El Muelle y preparen (esti añu sí) la cabalgata

Munchos neños y mayores yá nun pueden tar quietos de los nervios. Esti miércoles 5 de xineru Melchor, Gaspar y Baltasar, los trés Reis Magos, visiten Xixón, con llegada pela mañana a El Muelle pa preparase pa la cabalgata de la tarde y una llarga nueche d’entrega de regalos.

La hora prevista d’atraque del barcu real ye les 11, pa saludar a los presentes y montar nos coches especiales puestos pol Conceyu pa dirixise al Teatru Xovellanos. Ehí, dende les 12.30 hores, van recibir a les 3.308 persones que retiraron el pase que permite un breve alcuentru colos Reis Magos.

Yá de tarde, depués de que l’añu pasáu tuviera que suspendese pola situación sanitaria, les máxiques maxestaes van participar na cabalgata peles cais de la ciudá, que va constar de 11 carroces, de les que 4 van contar con música direuto, y más de 1.000 participantes. Ésta va salir a les 17.30 hores de la cai Simón Bolivar, en La Calzada, pa dirixise hacia Xixón pela avenida de Galicia, José Manuel Palacio y Marqués de San Esteban, pa xirar per Pedro Duro hasta Begoña y garrar San Bernardo hasta la plaza d’El Carmen y finar nos Xardinos de la Reina.

Enantes d’entamar col repartu de regalos, Melchor, Gaspar y Baltasar van dar el yá tradicional discursu a les 20 hores dende’l balcón de la Casa Conceyu.

Na semeya, los Reis Magos nuna visita previa a la villa.