Los autobuses nuevos d’EMTUSA dan visibilidá a la llingua asturiana

La Empresa Municipal de Tresportes Urbanos (EMTUSA) ta acabante de presentar cuatro autobuses nuevos Scania Euro 6c que dende la selmana pasada faen la llinia 20 ‘Nuevo Roces-Montevil-Somió (La Pipa). La llingua asturiana tien visibilidá nestos vehículos, que tamién lleven la marca ‘Xixón’ na parte esterior de la carrocería.

Cola incoporación d’estos autobuses EMTUSA sigue renovando la so flota con vehículos más modernos y ecolóxicos que dan facilidá al so usu por parte de discapacitaos auditivos y visulaes y persones con movilidá reducida. Tampoco nun s’olvida de la llingua del país, yá que tolos cartelos son billingües y incorpora’l logu de la ciudá n’asturianu na zona esterior.

Iniciativa pol Asturianu felicita a EMTUSA “pol usu y presencia del asturianu nos nuevos autobuses”. “Ésta ye una manera de tener presente el nuesu idioma que camentamos que se tien que mantener pal futuru a la hora de mercar nuevos coches pa la empresa o cualquier tipu de campaña. Sería interesante que les comunicaciones en redes sociales de la empresa de transporte tean en billingüe, yá que-y daría visibilidá a la llingua asturiana y nun supondría nengún costu”, apunta’l so presidente Inaciu Galán.