L’ochobre lliterariu xixonés vien con siete xornaes d’actividá n’asturianu

‘Ente fueyes. Ochobre lliterariu’ consolídase y convierte l’entamu de la seronda en Xixón nun momentu de celebración de les nueses lletres y muyeres escritores. La Fundación Muncipal de Cultura, Educación y Universidá Popular entama siete xornaes col asturianu como protagonista, dos d'elles nel Mercáu Artesanu y Ecolóxicu.

Ana Montserrat López Moro, conceyala de Cultura, Mocedá y Museos, tuvo acompañada na presentación d’esta edición na Escuela de Comerciu de Javier Ruiz-Cuevas, presidente de l'Asociación Mercado Artesano y Ecológico, y de María Xosé Rodríguez López, responsable de la Oficina de Normalización Llingüística. Rescampló la edil la función d’estes xornaes pa que los creadores dean a conocer “el so llabor lliterariu, pa que los llectores conozamos de primer mano lo último de la lliteratura actual” y “pa que la reciella esfrute con esposiciones de lliteratura infantil y con xuegos lliterarios y pa conocer a una de les figures más importantes de les lletres asturianes”, en referencia a Xosefa Xovellanos.

La edil de Foro esplicó darréu que “tamién esti Ochobre Lliterariu, y per tercer añu consecutivu, vamos ofertar, xunto col Mercáu Ecolóxicu y Artesanu de Xixón, un catálogu d’actividaes y propuestes pa recordar que’l día 16 d’ochobre la Biblioteca Nacional de España celebra la séptima edición del Día les Escritores pa vindicar el llabor y el llegáu de les muyeres qu’escribieron a lo llargo de la historia”. Asina apuntó que “esti añu’l lema escoyíu ye ‘El placer, l’allegría y la risa de les muyeres’ y ente les autores escoyíes pa esta edición van figures tan renomaes como Carilda Oliver, Remedios Varo o Almudena Grandes, que van compartir espaciu y pallabres con creadores asturianes como Xosefa Xovellanos, Paula Pulgar, Ana Vanessa Gutiérrez, Consuelo Vega, Maite Iglesias, Berta Piñán, Solinca Turbón, Cristina Muñiz y Alma Hidalgo, ente otres”.

"Too ello col envís d’avanzar nel camín de la recuperación y difusión del asturianu en Xixón, siempre dientro del marcu competacional del conceyu, en coordinación y collaboración con otres entidaes, coleutivos y asociaciones qu’intervengan tamién nel procesu de normalización llingüística", concluyó López Moro la so intervención.

El siguiente en tomar la pallabra foi Ruiz-Cuevas, que, en castellanu, apuntó que’l Mercáu Artesanu y Ecolóxicu incorpórase “a la celebración del Día de les Escritores per tercera ocasión. Dende l’entamu, falámoslo, y fixímoslo con escritores n’asturianu. Creíamos importante que se visualizaren les escritores n’asturianu”. Nesti mes van tar los puestos abiertos na Plaza Mayor per cuatro díes, del 12 al 15, y los dos primeros ye cuando se van concentrar les actividaes.

Asina, va haber visita de Xosefa Xovellanos el xueves 12 a les 18 hores y el vienres 13 a les 12.30, talleres infantiles con actividaes y xuegos pa conocer la so obra a lo llargo de les dos xornaes, amás d’una esposición entitulada ‘Les coses que-y presten a Fran’ a partir del llibru de Piñán y cuentacuentos sobre’l mesmu a les 17 hores. Quixo Ruiz-Cuevas recordar la reivindicación fecha l’añu pasáu de camudar el nome dedicáu a l’autora en Xixón, que recueye’l so nomatu L’Argandona, col unvíu d’una carta al respeutu, y señaló que tán “encantaos de participar. Préstanos y anímanos pa siguir trabayando poles escritores n’asturianu”.

El programa

Rodríguez López encargóse d’esplicar toles actividaes que conformen esti ‘Ente fueyes. Ochobre lliterariu’. La primera va ser el llunes, a les 19 hores nel partiu de Centru de Cultura Antiguu Institutu, la representación de ‘Les madreñes vacíes’, de Carlos Alba, obra ganadora del últimu Premiu y Festival Nel Amaro de Teatru Profesional en Llingua Asturiana o Gallego-asturiano, “un espectáculu con un puntu xuglarescu” con música y títeres.

El martes 10 d’ochobre, a les 19 hores na sala de conferencies del Antiguu Institutu, va presentase ‘Los carreros del tiempu’, XXVIII Premiu Xuan María Acebal de poesía, correspondiente al añu pasáu, que firma Marta Mori, “una referencia de la poesía asturiana”. El xueves 12 y el vienres 13 van tener llugar les actividaes nel Mercáu Artesanu y Ecolóxicu, y el martes 17, de vuelta al Antiguu Institutu, David Guardado va falar del so llibru ‘Nunca vencida. Una idea d’Asturies’, “un esceicional y necesariu ensayu”.

L’espectáculu musical lliterariu ‘Fierro, cabrón y metralla. Música y lletres pa una tarde ensin Interné’, del periodista Paco Álvarez y l’acordionista David Varela, va ocupar la tarde del xueves 19, nel mesmu llugar y la mesma hora, na que l’escritor “escoyó unos retayinos de la so obra y David Varela pon música”. Y pa poner el ramu al ochobre lliterariu xixonés, el xueves 26, a les 19 hores nel antepar del segundu pisu de la Escuela de Comerciu, va presentase’l númberu 39 de la revista ‘Lliteratura’ de l’Academia de la Llingua Asturiana, actu col que “visibilizar tamién a los autores más nuevos” al tiempu de conocer obra de “la xente más consolidao”.

Na semeya, Ruiz-Cuevas, López Moro y Rodríguez López.