"Lo razonable ye que Xixón tenga un presupuestu nel 2017”, afirma Couto

El presupuestu pal 2017 de Foro yá ta enriba la mesa de tolos grupos municipales. "Lo razonable ye que Xixón tenga un presupuestu”, afirma'l voceru de la formación que gobierna'l conceyu, Fernando Couto, que pretende evitar una prórroga presupuestaria nueva.

"Ya comenzaron les reuniones colos grupos y agora vamos ver lo que caún propón, ensin nengún tipu de barrera, y buscar que se pueda ellaborar un documentu que sirva pa que Xixón tenga un presupuestu, que ye lo razonable”, afirmó ayeri en rueda de prensa. Darréu señaló, en referencia a les crítiques recibíes pol PSOE, que “nun creo que sía oportuno nesti momentu convertir el presupuestu nuna ferramienta de confrontación, porque a lo último lo que va perder ye la ciudá, sobre manera poles inversiones o les cuestiones d'importancia que se retrasen; inclusive dalgunes d'elles quedaríen ensin executase”.

Cola intención d'amosar la bona disposición de Foro p'algamar alcuerdos con respeuto a les cuentes col restu de formaciones, apuntó que "nun podemos da-y a la oposición más que la nuesa pallabra de que se va incorporar, dientro del consensu, lo que presenten los grupos si sirve para facer un documentu que se pueda votar y sía aceptable pola mayoría”, insistió Couto, que se mostró optimista nesi sen.