Llucha contra l’aviespa asiática: trampes en 200 puntos del conceyu

La Unión de Cooperativas Forestales de Asturias va encargase dende esti martes de la execución del Plan d’Actuación pa la Detección y el Control de la Aviespa Asiática. Van colocase trampes en 200 puntos del conceyu pa lluchar contra esta especie invasora.

El contratu axudicáu dende la Conceyalía de Mediu Ambiente y Movilidá afita trés tipos d’actuaciones: la realización d’un plan de trampéu primaveral de reines fundadores, la retirada de niales yá construyíos y l’entamu d’aiciones de formación y divulgación sobre la Vespa vetulina nigrithorax. El primeru va facese mientres cuatro meses en terrenos públicos de toles parroquies rurales, amás de zonas semiurbanes o perifériques, y otros espacios y parques qu’axunten les condiciones.

En total van ser 200 trampes, que se van poder consultar na aplicación web y móvil del Gobiernu, AvisAp. Éstes van revisase y sustituyíes cada quince díes un total de siete veces, con un cómputu final de 1.400 trampes revisaes y controlaes.

En mayu van principiar les xeres de retirada y neutralización de niales embrionarios, hasta’l mes d’agostu, y primarios y secundarios ente los meses de xunetu y avientu. En total la previsión ye neutralizar 150, que serán igualmente rexistraos n’AvisAp.

Formación a vecinos y coleutivos

La empresa ha de poner tamién 8 hores de formación distribuyíes en trés xornaes. Una va ser de 4 hores destinada a personal municipal implicao en temes ambientales y nel control del inseutu, y les dos restantes dos de 2 hores de llargor caúna a asociaciones vecinales y otros coleutivos cola fin de divulgar conocimientos precisos sobre la especie y les téuniques pal so control.