Lisardo Lombardía falará d'Asturies y l'interceltismu na charra mensual d'Astura

La conferencia mensual de l'asociación cultural Ástura tien como convidáu pa esti mes a Lisardo Lombardía que va falar del interceltismu, un conceutu que quier valorizar los parelelismos culturales nel Arcu Atlánticu.

L'Interceltismu rincipió a tomar cuerpu na primera metá del sieglu XIX y foi un elementu dinamizador nel desendolcu del movimientu rexonalista bretón. Por embargu, ye dempués de la II Guerra Mundial, y en concretu cola fundación del Festival Intercélticu de Lorient (FIL) qu’esi conceutu va tresformase en catalizador de verdaderes rellaciones ya intercambios culturales y mesmo económicos nel marcu de la construcción europea.

Asturies, reconocida na so espresión cultural y artística na familia intercéltica, tien que desendolcar tamién estos contautos paralelos que deberíen contribuyir a granibles acuerdos económicos.

Lisardo Lombardía, presidente de la Fundación Belenos y dende 2007 ye director xeneral del Festival INtercélticu de Lorient, va falar d'esti movimientu social, cultural y económicu cola so proyeición de futuru y les ventayes que tien p'Asturies.

Va ser esti martes 20 a les 20:00h., na sede del Atenéu Obreru de Xixón (Cuadonga, 7).