L’Hospital de Cabueñes crea una unidá d’esclerosis múltiple

Ye la primera que s’abre n’Asturies destinada al abordaxe esclusivu d’esta patoloxía neurodexenerativa y discapacitante, qu’esixe una asistencia personalizada.

L’Hospital Universitariu de Cabueñes cunta dende güei con una unidá d’esclerosis múltiple que va dexar ameyorar l’atención que s’ufierta a los 600 pacientes afectaos por esta enfermedá nel área sanitaria V y facilita-yos l’accesu a les innovaciones diagnóstiques y terapéutiques. Va disponer de dos consultes atendíes por trés médicos y una enfermera, que van cuntar col apoyu de los residentes de Neuroloxía y Farmacia.

Trátase de la primer unidá que s’abre n’Asturies dedicada al abordaxe monográficu d’esta patoloxía neurodexenerativa y discapacitante, qu’esixe una asistencia personalizada a cada paciente y que foi bien demandada poles asociaciones d’afectaos.

La unidá dispón de dos consultes coordinaes polos especialistes de Neuroloxía qu’ufierten serviciu diariu a los pacientes, amás d’atender les urxencies que puedan surdir poles complicaciones de la mesma enfermedá o polos efectos adversos de los tratamientos.

El xerente del Serviciu de Salú del Principáu d’Asturies (Sespa), José Ramón Riera, asistió güei a l’apertura de la unidá, qu’al mandu va tar la xefa de la sección de Neuroloxía de Cabueñes, Dulce María Solar, y Dionisio Fernández Uría, que se va encargar de la so coordinación. Tamién formen parte de la mesma’l neurólogu Roberto Suárez Moro y la enfermera Delia Rubio, amás de los médicos internos residentes de Neuroloxía y Farmacia, en rotación.

La esclerosis múltiple ye una enfermedá del sistema nerviosu qu’afecta al cerebru y a la médula espinal. Ataca a la mielina, el material qu’arrodia y protexe les célules nervioses, lo que bloquia los mensaxes ente’l cerebru y el cuerpu o los fai más lentos, de manera que pue provocar alteraciones de la vista, debilidá muscular, problemes cola coordinación y l’equilibriu, sensaciones como entumecimientu, pruyidura o pinchazos y lapsus de memoria. La so causa ye desconocida, ye más frecuente ente les muyeres qu’ente los homes y suel empezar ente los 20 y los 40 años, polo qu’afecta directamente a la vida social y familiar de los pacientes, amás d’al so desenvolvimientu profesional.

Un tratamientu correctu y un manexu afayadizu de la enfermedá dexen caltener los síntomes baxo control y retrasar la progresión de la discapacidá. La patoloxía suel cursar en brotes, polo qu’existe una demanda grande d’atención ensin programar, que provoca un índiz altu de visites a urxencies. Esti fechu pue eliminase de dalguna manera cola creación d’una unidá de bon accesu onde’l paciente pueda consultar duldes, recibir meyor atención y adpatar el so tratamientu.

1.300 persones afectaes n'Asturies

Calcúlase que la esclerosis múltiple afecta a unos 1.300 asturianos, de los qu’aproximao la metá seríen pacientes del área sanitaria V. “Anguaño danse a lo menos unos 130 casos por cada cien mil habitantes d’Asturies, anque nos últimos años tamos viendo un aumentu curisou de la incidencia, sobre manera ente les muyeres. Ye la enfermedá neurolóxica más frecuente n’adultos mozos”, esplicó’l doctor Dionisio Uría.

La complexidá del diagnósticu y tratamientu de la enfermedá ye’l factor principal qu’impulsó la creación de la unidá nel Hospital de Cabueñes, porque se trata d’una patoloxía qu’esixe un enfoque perespecializáu y un control continuu y meticulosu de los pacientes pa evaluar la efectividá de los tratamientos y los sos posibles efectos secundarios.

“La principal ventaya que da esta unidá frente a les consultes especializaes ye que garantiza una mayor axilidá nel diagnósticu y nel abordaxe integral de la enfermedá, amás d’un meyor siguimientu de los pacientes gracies a la protocolización de tolos procesos. Tamién dexa intercambiar datos con otros hospitales, realizar trabayos con ellos de forma conxunta y acceder a ensayos clínicos con fármacos nuevos”, sorrayó Dulce María Solar.