L’esperáu Campuzano adelantó la so llegada al Sporting

David Gallego yá tien el delanteru que quería. El fichaxe de Dimata pol Espanyol abrió la posibilidá de que Campuzano, con alcuerdu col club pal branu, pudiera salir del club catalán destín a Xixón pa refozar un puestu nel que’l Sporting sólo contaba con Djurdjevic tres la marcha como cedíos nesti mercáu d’Álvaro Vázquez y Neftali.

Víctor Campuzano va vestir de roxiblancu per cuatro temporaes y media. El delanteru barcerlonés de 23 años firmó hasta 2025 pol Sporting nuna operación que dependía de la llegada d’otru nueve al Espanyol y de la bona voluntá del club col so canteranu.

Finalmente permitió la salida a Xixón que negó n’ochobre al xugador, anque se guarda un porcentaxe de los sos derechos federativos. Ocupa’l so puestu na plantía perica el delanteru belga nacíu na República Democrática del Congo, Nany Landry Dimata, cedíu hasta final de temporada por otru Sporting, l’Anderlecht, con opción de compra.

El delanteru catalán ye una apuesta espresa de Gallego, que lu tuvo nes categoríes inferiores y nel primer equipu del Espanyol. Amás cumple col perfil que quier pal so mou de xuegu, al ser un futbolista rápidu, vertical y con bona definición.

Campuzano viaxó güei a Xixón y esta tarde pasó’l reconocimientu médicu. Mañana va ser presentáu a les 13 hores n’El Molinón, día nel que se va xunir al grupu pa preparar la visita del sábadu a la UD Logroñés (18.15 hores, Movista LaLiga).