Les visites temátiques guiaes n'asturianu tornen esti mes

Tres la esperiencia d'avientu, la iniciativa Xixón Tours torna esti mes de xunu. Destinada a xente tanto de dientro como de fuera del conceyu, inclusive a non falantes d'asturianu, permite conocer la ciudá al traviés de visites temátiques que nun dexen indiferentes.

Les rutes de XixónTours tán diseñaes pa buscar un averamientu orixinal a la historia de la ciudá, tratando de da-y un enfoque diferente que llame l’atención del públicu xeneral y n’especial de los y les xixoneses, que yá conociendo los llugares que van visitar pueden ver aspeutos estremaos o desconocíos pa ellos. Al igual que n'avientu, van repetise les trés rutes desendolcaes por Arantza Margolles, Daniel García de la Cuesta y Inaciu Galán.

La primera, mañana al meudía, va ser 'Muyeres na hestoria de Xixón', que va afondar en muyeres importantes na historia de la ciudá, como Xosefa Xovellanos, Aurora Sánchez, Corín Tellado, María González La Pondala, Concha Mori, Pepa Osorio, María Teresa González, asina como de coleutivos como'l de les cigarreres o les pescadores. Ésta va repetise'l sábadu 15 y el 29 a la mesma hora.

'Xixón de mieu', mentres, va averar a los y les visitantes a los llugares históricos de la ciudá onde se produxeron asesinatos, matances, invasiones sangrines, apaiciones de pantasmes y lleendes, permitiendo que los presentes, siempre n'horariu nocherniegu, puedan conocer los sitios más escuros, terroríficos y misteriosos de la historia de la ciudá de Xixón. Les salides tán previstes los vienres 14, 21 y 28 a les 22 hores.

Completa la ufierta de Xixón Tours pa esti xunu 'Escritores n'asturianu en Xixón', que namái va tener una salida, el sábadu 22 al meudía. Esta ruta va permitir a asistentes conocer el quioscu de Pachín de Melás na Plaza del 6 d'agostu; el Teatru Xovellanos, onde s'estrenaron munches obres d'Eladio Verde; el conventu de Cimavilla onde tuvo Xosefa Xovellanos; asina como espacios qu'apaecen na obra d'autores contemporáneos como María Teresa González, Pablo Antón Marín Estrada o Vicente García Oliva.

6 euros

Toles visites tienen un costu de 6 euros pal públicu xeneral y de 3 pa los menores de 18 años. Pa participar ye obligatorio inscribise na páxina web de la iniciativa con un día d'antelación, anque'l pagu fadráse al comienzu de la ruta.

Na imaxe, cigarreres de Xixón. Semeya de Xixón Tours.