Les procesiones en Xixón dexaron de celebrase nos 70 y nun volvieron hasta 24 años depués

L'añu 1971 tuvo llugar una procesión del Santu Entierru na parroquia de San Pedro y Xixón nun vería más pasos peles sos cais en Selmana Santa hasta'l 1995. Asina foi cómo dexaron de facese, qué tuvo que ver el Conciliu Vaticanu II nel so desaniciu, y cómo foi la so vuelta.

L’añu 1972 desapaecieron les procesiones na villa en Selmana Santa. Foi la parroquia de San Pedro, la más venceyada a esta festividá, la última en facelo en 1971 por decisión del párrocu Bonifacio Sánchez porque “les actitúes de dalgunos de los que participaben nes procesiones nun guardaben el debíu respetu qu’esixía dalgo tan serio como la conmemoración de la Pasión de Cristo”, esplicaba l'estudiosu de la historia de Xixón Janel Cuesta.

En 1965 acabara'l Conciliu Vaticanu II, convocáu pol Papa renovador Pablo VI, que propugnaba adaptar la Ilesia católica a les "necesidaes y métodos del so tiempu" y l'aire nuevu del conciliu diba llegando a les parroquies, qu'apostaben por una relixosidá austera y discreta que nun se basara nes esaltaciones esternes, lo que s'axuntaba a la falta de relevu xeneracional nes parroquies.

El mesmu Cuesta señalaba'l refugu de dellos sacerdotes xixoneses a “toa manifestación de cultu esternu” nos años últimos de la década de los 60 como causa d’esti desaniciu de les procesiones xixoneses. De fechu, dende esa última del Santu Entierru pasaríen 24 años hasta la siguiente, el Vienres Santu del 1995.

Foi per mediación de la renacida Misericordiosa Cofradía del Santo Entierro y de la Soledad, qu’asina siguía’l camín de L’Infiestu o Ribeseya, que recuperaren les procesiones l’añu 1994, o d’Uviéu, que tamién volvía esi 1995 de la mano de la Hermandad y Cofradía de Nuestro Padre Jesús Nazareno. Y San Pedro yera otra vuelta motor de la Selmana Santa xixonesa.

Nel 1998 separtaríense les cofradíes que-y dieron orixe pa diferenciase colos sos propios pasos, quedando la Ilustre Hermandad de la Vera Cruz, la Ilustre Hermandad de la Santa Misericordia y la Ilustre Cofradía del Santo Sepulcro, qu’entama la procesión del Santu Entierru na que tamién participen les otres dos llevando un pasu caúna.

Les trés conformen la Junta Mayor de Cofradías y Hermandades Penitenciales de Gijón y son les qu’organicen les diferentes procesiones que tienen llugar estos díes na villa, incorporándose recién la Cofradía del Santo Niño del Remedio venceyada a San Pedro y formada pa tratar d'incorporar a neños a la Selmana Santa.