Les movilizaciones de Naval Xixón protagonicen un diorama con clicks espuestu na Canteli

Son más de 160 muñecos de Playmobil o clicks, dellos vehículos y edificios que representen un enfrentamientu ente los trabayadores de Naval Xixón y la Policía tan habituales en décades pasaes. Obra de Pixi, va inaugurase esti martes na Sidrería Canteli cola presencia de Xune Elipe, onde'l diorama va tar espuestu hasta'l xueves.

Dos hores y media lleva’l so montaxe nel que, amás de los clicks, pue vese 3 furgonetes policiales, 1 ambulancia, 2 grúes y 1 barcu y edificios como una comisaría, un bancu y un chigre colocaos nun especiu de cuasi 5 metros de llargor. Una composición tres la qu'hai años de trabayu y na que Pixi contó cola collaboración d'Antón, cola cesión de pieces importantes como’l barcu pa los soldadores, y Milio na so instalación.

A les 20 hores d’esta tarde va tener llugar l’actu d’apertura, nel qu'Elipe, cantante de Dixebra, va falar como convidáu del discu-llibru ‘Ente la niebla’, trabayu últimu de Dixebra que ta acabante de ver la lluz, con un tema ‘El Natahoyo’, dedicáu a la llucha protagonizada polos trabayadores del astilleru Naval Xixón, asitiáu nesti barriu, en defensa de los puestos de trabayu. El diorama que pretende recordar eses movilizaciones va siguir espuestu nel chigre de la cai Almacenes hasta’l xueves nel so horariu habitual.