L’alcaldesa anuncia’l fin de los toros en Xixón

La corrida de toros del domingu, Día de Begoña, será la última que se celebre na plaza d’El Bibio. L’alcaldesa Ana González Rodríguez anunció esti martes que nun va prorrogar el contratu con Circuitos Taurinos nin va sacar a concursu ún nuevu, poniendo fin a la Feria Taurina de Begoña llueu de 133 años d'eventos taurinos na villa.

Nuna visita a la Feria de Muestres d’Asturies (FIDMA) argumentó la so decisión na cada vez mayor oposición a los toros ente la ciudadanía y a la polémica llevantada na corrida del domingu, la tercera de la Feria, na que se sacó al ruedu a un exemplar de nome ‘Feminista’ y dos d’igual apellativu, ‘Nigeriano’, de la ganadería de Daniel Ruiz. “Nesta feria pasáronse dalgunes llinies”, aseguró.

“Nun conceyu, nuna ciudá, como Xixón, que cree na igualdá de muyeres y homes, que cree que somos tierra d’inclusión y nos derechos humanos, nun podemos xugar con estes coses”, añadió González Rodríguez. Cola rescisión del contratu, Xixón va poner fin a 133 años d’eventos taurinos.

La plaza de toros d’El Bibio, inaugurada’l 12 d’agostu del 1888 pa promover el turismu na villa, venía acoyendo tolos branos corríes de manera ininterrumpida. Namái nel 1915, nel periodu de la Guerra Civil, del 1936 al 1940, y l’añu pasáu pola pandemia de COVID-19, nun s’organizó la Feria Taurina de Begoña.

Na semeya, el 'paseíllo' de la corrida del domingu, última n'El Bibio.

Calca equí pa conocer la nuesa entrada 'Xixón antituarina' de la estaya 'Curiosidaes'.