La zona de gran afluencia turística amplíase a Cimavilla y L’Arena

La xunta de gobiernu aprobó ampliar la zona de gran afluencia turística pal añu 2024, incorporando asina a Cimavilla y L’Arena a esti área. Tamién decidióse la convocatoria d’una bolsa d’emplegu temporal pa cubir 30 places de Policía Llocal y diose’l preste a un conveniu col Gobiernu pal caltenimientu la Rede de Cases d’Acoyida.

Creada nel 2015, la zona de gran afluencia turística incluyía hasta’l momentu’l perímetru urbanu llendáu pola plaza del Marqués, Xardinos de la Reina, cais Rodríguez San Pedro y Pedro Duro, plaza de L’Humedal, Palacio Valdés, carretera de la Costa hasta Ramón y Cajal, cais Menéndez Pelayo, Marqués de Casa Valdés y Capua, El Náutico, cai Cabrales y Plaza Mayor. La modificación nueva amplíala pel norte a tola zona urbana de Cimavilla y, pel este, a L’Arena, marcando la frontera l’avenida Castilla.

Esta delimitación, permitida por llei a conceyos de más de 100.000 habitantes que rexistrara más de 600.000 agospios l’añu anterior, dexa fixar, ente otres coses, determinaos domingos d’apertura pa diferenciar ente centros comerciales y el comerciu de ciudá. Los díes días 4 y 25 d’agostu del 2024 van poder abrir los segundos que s’asitien nesta zona de gran afluencia turística.

Nel aconceyamientu del martes tamién se dio’l preste a la convocatoria de la bolsa d’emplegu temporal pa cubrir 30 places de Policía Llocal, con incorporación a partir d’abril, y la robla del conveniu de collaboración col Gobiernu pal caltenimientu de la Casa Malva, dientro de la Rede de Cases d’Acoyida pa Muyeres Víctimes de Violencia de Xéneru, por 120.000 euros. Otra manera, fuera del orde del día, ente diferentes asuntos, aprobáronse les subvenciones de la convocatoria pa Proyeutos de Recuperación y Difusión en Memoria Democrática pal presente ejercicio por un total de 39.266 euros.

Na semeya, carretera la Costa, llende pel sur de la zona de gran afluencia turística.