La XLII Selmana de les Lletres Asturianes trai una esposición y el concursu Entaína a Escribir a LLABoral

Estos díes ta celebrándose la gran fiesta de la nuesa lliteratura, la XLII Selmana de les Lletres Asturianes. Xixón acueye dos de los eventos programaos, la esposición ‘Nel Amaro-Postal/Visual’ coordinada por Xandru Fernández y el concursu Entaína a Escribir, con sede en LLABoral Centru d’Arte y Creación Industrial.

La inauguración de la esposición sobre l’artista al que ta dedicada esti añu la Selmana de les Lletres va celebrase mañana al meudía. L’amuesa recueye fundamentalmente trés facetes de la so trayectoria creativa: poesía visual, arte postal y videocreación.

“Dialoga con materiales básicos, cuasi que refugaya, colos códigos de la publicidá y la cultura audiovisual de mases, y entemez técniques clásiques con construcciones fuxidices, alcuando limítrofes col mal gustu”, apunta'l so coodinador. Va poder visitase hasta’l 26 de xunu col horariu siguientu: hasta’l 14 de xunu, de 10 a 19 hores, de miércoles a vienres, y 12 a 19 hores, de sábadu; y hasta’l 26, de 11 a 19 hores de miércoles a sábadu.

Pa menores de 35 años

El vienres esi mesmu llugar, a les 18.30 hores, va acoyer per primer vegada el concursu Entaína a Escribir, qu’algama la so sesta edición. Los participantes, que tienen hasta mañana a les 14 hores pa inscribise nel corréu electrónicu cridj@asturias.org, habrán de facer microrrellatos improvisaos nun tiempu máximu de 20 minutos a partir del tema y indicaciones que'l xuráu dicte nel momentu.

Esta actividá, na que collabora l’Institutu Asturianu de la Mocedá, ta destinada pa persones d’ente 14 y 35 años. Los ganadores van llevar un llote de llibros y discos, mentes que tolos inscritos van recibir un llibru como regalu.