La solicitú de la renta social xenera grandes fileres nos centros

Andecha Astur critica'l retayu y mou de repartu d'esta ayuda municipal.

El martes centenares de persones averáronse a los centros municipales pa solicitar la renta social, provocando grandes fileres. El cambiu nel mou de repartu, según l'orde de pidimientu hasta finar les perrres, provocó estes situaciones, a lo qu'hai que sumar el gran retayu que vive esta ayuda, que queda nunos reducíos 500.000 euros cuando nel 2017 movilizó 8,3 millones en dos convocatories.

La oposición y sindicatos critiquen la mala xestión de Foro. Tamién Andecha Astur, qu'esixe "un repartu xustu de la renta social y la toma de midíes que finen cola situación precaria de miles de xixoneses".

"El despropósitu de repartir la renta social en función de la velocidá a la hora de presentar la documentación, anunciando d’antemán que la dotación total algamará escasamente p'asegurar los drechos d’unos 300 ciudadanos cuando el primer díi multiplicóse yá esa cifra por diez, convierte lo que yera una aniciativa exemplar nuna tomadura de pelu a los que peor lo tan pasando", llamenta la formación nacionalista, que demanda "la puesta en marcha de midíes p'aniciar emplegos dignos que faigan innecesario medrar la dotación económica pa fines sociales" amás de "un repartu xustu y una mayor dotación".