La ‘Semana Negra’ amiesta un añu más cultura y diversión nos terrenos de Naval Xixón

Xira la noria, símbolu yá, depués de tantos año presidiendo, de la ‘Semana Negra’. El certame al rodiu la lliteratura prieta torna a ufrir a la ciudadanía’l so amiestu de cultura y diversión hasta’l domingu, con una amplia programación, nos terrenos de los astilleros Naval Xixón mientres busca ubicación estable pal futuru.

Y la ciudadanía respuende un añu más, como amuesa l’asistencia grande nos primeros díes del festival a pesar de competir con Metrópoli, eventu que vien faciendo coincidir el tramu final de la so actividá coles feches históriques de celebración de la ‘Semana Negra’. Más de 150 autores de numberoses nacionalidaes, yá consolidaos o promeses lliteraries, participen nesta edición, la trentena segunda, pa dar a conocer los sos trabayos, a los que se sumen charres, alderiques y esposiciones de delles temátiques.

Nel tarrén del ocio hai que destacar la programación musical tanto nel escenariu central (22.30 hores) como nos bares del recintu. Tres los conciertos de Winchester y Mad Rovers, Muñeco Vudú y Héctor Tuya, de díes atrás, esti llunes ye’l turnu de los gallegos Dakidarría, que destaquen por emplegar el gallegu en tolos sos cantares, pa siguir cola estauxunidense Bette Smith (mañana), los andaluces O’Funki’Illo (miércoles), el madrilanu Rodrigo Mercado (xueves), l’aragonés Bigott (vienres) y Lecter Bukosky (sábadu).

Esti añu podría ser l'últimu de la 'Semana Negra' nos terrenos de Naval Xixón, polo que yá s'abrió l'alderique sobre una ubicación estable pal certame. Tanto organización como'l PSOE, agora nel gobiernu municipal, siguen apostando pola parcela asitiada xunto al campus, en Cabueñes, pero la Universidá d'Uviéu caltién la so postura de refugu a dichu emplazamientu.

Alderique de la FSA sobre la oficialidá

La Carpa de la Pallabra va acoyer esta tarde esta mesa redonda entamada pola Federación Socialista Asturiana (FSA)-PSOE de títulu ‘Les oportunidaes de la oficialidá pa la industria cultural d’Asturies’ na que van participar persones destacaes del mundu cultural asturianu. Asina, dende les 21.30 hores van dar les sos impresiones sobres esti asuntu los escritores Berta Piñán y Inaciu Galán, la cantante Anabel Santiago, el periodista Cristóbal Ruitiña y el traductor y alministrador de la Wikipedia n’asturianu, Víctor Suárez, baxo la moderación de María Luz Pontón, secretaria d’Educación, Universidaes y Normalización Llingüística de la FSA.