La Selmana Grande convierte a la villa nuna gran folixa

Xixón disfruta de les sos fiestes. Xixoneses y visitantes acuden a los munchos conciertos y actividaes programaes nuna Selmana Grande qu’arrancó’l domingu cola llectura del pregón por parte de miembros del Club de las Guisanderas y que va tener como momentu central la Nueche de los Fueos el llunes 14 y que va pesllar el martes el restallón.

El pregón, delles actuaciones folclóriques, el ‘Gijón del alma’ interpretáu por Víctor y la gala del XXIII Festival Internacional de Bandes de Gaites Villa de Xixón na Plaza Mayor sirvieron d’entamu de la Selmana Grande nuna villa que vive un gran ambiente, con una importante presencia de turistes nos principales llugares d’interés. A ello hai que sumar la celebración de la LXVI Feria Internacional de Muestres d’Asturies (FIDMA), qu’avera al Recintu Ferial Luis Adaro a más de 700.000 visitantes.

Los conciertos ye ún de los principales reclamos de les fiestes de Xixón. Los de Ginebra, na Plaza Mayor, y Celtas Cortos, na sablera d’El Natahoyo, foron los primeros y güei va ser el turnu de la cantante y compositora portuguesa Luisa Sobral (21 hores) y ‘Hola Raffaella’ (23 hores), tributu a la italiana al que pon voz la so paisana Vanessa Grillone, de manera respeutiva.

El restu d’actuaciones son les siguientes: Tomasito y Red Bull Batalla d’exhibición, mañana; Leo Rizzi y La Pegatina, el xueves; Furious Monkey House y Dani Fernández, el vienres; Recicled J y The Human League, el sábadu; y The Black Angels y Kiko Veneno, el domingu. El llunes, Nueche de los Fueos, va tar amenizáu por Assia na sablera d’El Natahoyo enantes y depués del llanzamientu, y, dende les 00.30 hores, por Salvajex en Begoña, Eleven na plaza 3 d’abril, Dúo Premium en L’Arbeyal y Cuarteto Folixa na plaza la República.

El martes, Día de Begoña, va ponese’l ramu a la Selmana Grande cola Danza Prima y el restallón a les 14 hores. Pela tarde, a les 20 hores en L’Arbeyal, va haber un conciertu de Pájaros en la Cabeza.

Na semeya, actuación ayeri de los castellanos Celtas Cortos na sablera d'El Natahoyo éntes miles de persones.