La Revoltosa acueye la presentación en Xixon de 'En llucha incierta'

La versión asturiana de la novela de John Steinbeck ye obra de Daniel García Granda.

La llibrería-café La Revoltosa ta celebrando'l so décimu aniversariu y, ente les sos munches propuestes, ta la presentación de la traducción, númberu 9 de la coleición 'Calume' d'Ediciones Trabe, de ‘In Dubious Battle’. Ésta ye una novela política desconocida por munchos llectores que llega al asturianu como 'En llucha incierta escrita pol Nobel de Lliteratura del 1962 nel añu 1936.

“Trata sobre güelgues, xornaleros, pumaraes, los woblies, los vixilantes, el maccarthismu...”, dixo García Granda de la que considera "meyor novela de Steinbeck quitando ‘Les uves de la ira’” a Asturies.com. Una historia que trescuerre nes “pumaraes del sur de California y neses décades, nos años 30 y 40, cuando hebo munches güelgues nes dos costes, nel este y nel oeste, y que son los entamos tamién del Partíu Comunista nos Estaos Xuníos. La novela ta más enfocada nel Partíu Comunista, nun rapaz que se llama Jim que quier afiliase al partíu y ponese a facer trabayu de campu: entamar güelgues y armales mui gordes”, esplicó'l polesu, que va tar acompañáu na presentación d'esta tarde, programada pa les 19.30 hores, de Rafael Rodríguez Valdés, direutor de la coleición 'Calume'.

Na semeya, el traductor firma exemplares del llibru depués d'una presentación celebrada na mierense La Llocura.