La proteición como espaciu históricu de los Xardinos de la Reina condicionará la obra de reforma

La intención de l'Autoridá Portuaria de reformar los Xardinos de la Reina tará condicionada pol calter d'espaciu históricu que tien esta zona nel Catálogu Urbanísticu. Esti aspeutu nun se tuvo en cuenta na llicitación de les obres, como denuncia Izquierda Xunida (IX) basándose nos conocimientos del historiador Héctor Blanco.

"El proyeutu pretende una remodelación radical qu'arrasaría col diseñu orixinal de los xardinos ellaboráu por Pedro Múgica", afirma l'espertu. “Ye un xardín públicu con proteición integral, qu'implica la proteición del arboláu históricu, les faroles y el diseñu orixinal”, añadió, pa depués comentar que lo únicu que camudó del mesmu en más de cien años ye "el tamañu de les palmeres”.

Esta circunstacia nun impide que se puedan acometer meyores "pol pasu del tiempo en pavimentos, canalizaciones o instalaciones soterrañes", indica Blanco. Dende IX, pela so parte, apunten que nun tán en contra de la reforma nin de la modificación del carril-bici, pero "con respetu al Catálogo Urbanísticu”, destacó'l so voceru Aurelio Martín.

Na semeya, Martín y Blanco.