La lliteratura toma'l Paséu de Begoña

|
La lliteratura toma'l Paséu de Begoña

La II Feria del Libro de Xixón axunta a llibreríes y editoriales, y programa una gran cantidá d'actividaes per cuatro díes.

Un total de 22 llibreríes xixoneses y 19 editoriales participen nesti certame lliterariu qu'entama'l Conceyu de Xixón y que repite escenariu, el Paséu de Begoña. Dende güei y hasta'l domingu, xixoneses y visitantes van poder conocer novedaes editoriales, mercar llibros y participar nes munches actividaes programaes pa estos cuatro díes nel horariu siguiente: de 11 a 14 y de 17 a 21.30 hores, a esceición del domingu, que va pesllar a les 20 hores.

Editoriales con presencia de la llingua asturiana nel so catálogu como Trabe, Impronta, Trea, Pintar-pintar, Hoja de Lata o KRK, van tar presentes en Xixón. L'asturianu tamién va tener güecu na programación prevista pa estos díes nes carpes instalaes nel llugar, siendo la primer actividá centrada nel nuesu idioma la presentación la de la obra 'Fabia', de Nel Morán, a les 13.30 hores.

El programa completu de la Feria del Libro de Xixón pue consultalu nel documentu axuntu a esta noticia.

Xixón de Novela

La Oficina de Normalización Llingüística tamién participa nesti certame lliterariu cola aplicación Xixón de Novela. Ésta permite percorrer la ciudá siguiendo'l filu d'obres que se desendolquen en Xixón n'asturianu, pudiendo consultar los testos, en munchos casos narraos pol propiu autor, y inclusive un videu.

D'igual forma, dientro de les rutes lliteraries guiaes, entámase una al respeuto, que va tener salida al meudía de güei y de mañana del puestín de la Rede Municipal de Biblioteques. La inscripción pa la mesma pue formalizase nel mesmu llugar o peles víes habituales de les actividaes municipales, como los caxeros ciudadanos.

Contador Estadistiques