La guía didáutica ‘Xixón, una ciudá abierta a la mar’ yá tien versión dixital

Les maestres y maestros de Llingua Asturiana y Lliteratura tienen a la so disposición na rede la guía didáutica ‘Xixón, una ciudá abierta a la mar’ ellaborada pola Oficina de Normalización Llingüística. Un guapu preséu pa que les escolines y escolinos puedan investigar y deprender la historia de la mar de Xixón d'una manera prestosa.

‘Pelayo mira pa la mar’, ‘Bordiando’l Muelle’, ‘Na Rula nun pregunten, apunten’, ‘Vete a ver la ballena’, ‘Caminando per Cimavilla’, ‘Muyeres trabayadores’, ‘Arrodiaos’, ‘Xixón villa mariniega’, ‘A date un bañu’ y ‘Quedamos na Escalerona’ son los diferentes temes a tratar nuna ruta qu’entama na plaza’l Marqués y fina na sablera San Llorienzo llueu de percorrer toa Cimavilla. Sitios pelos que la reciella tien pasao en munches ocasiones, pero onde hai detalles que quiciabes neñes y neños nun repararon.

La guía didáutica ‘Xixón, una ciudá abierta a la mar’, que na so versión dixital cuenta con efeutos sonoros, pretende dar a conocer estes curiosidaes en testos temáticos que se complementen con actividaes y xuegos qu’obliguen a les escolines y escolinos a investigar. Los sos oxetivos son “conocer y valorar la historia de la mar de Xixón” y deprender a interpretar información, a valorar la importancia de los museos, a afitar comparaciones ente la vida propia y la de persones del pasáu, y a asitiase nos mapes.

P’acceder a esta ferramienta pensada pa maestros y maestres de cuartu de Primaria, pero accesible y útil pa padres, güelos y cualquier ciudadanu que quiera dar a conocer a neñes y neños estos datos, ha calcar nesti enllaz.