La feria taurina nun se llibra de les protestes
|
16 Agostu, 2019 por Redacción
Estos díes ta celebrándose n'El Bibio la Feria de Begoña. Esti festexu, vendíu dende l'Ayuntamientu como un atractivu más de la Selmana Grande, tien una importante respuesta ente la población, que yá nel 1914 salió a la cai pa declarase contraria a la mesma.
El 15 d'agostu d'esi añu, Día de Begoña, la Sociedad Antiflamenquista Cultural y Protectora de Animales y Plantas entamara una xira n'El Coto, a la qu'acudieron 4.000 persones, como documenta la prensa de la época. Centros culturales y asociaciones obreres sofitaren la mesma.
Esti refugu a les celebraciones taurines n'Asturies nun yera nuevo, yá que dende Gaspar Melchor de Xovellanos numberosos inteleutuales y ciudadanos posicionáronse en contra a esti tipu de festexos. Nos años últimos vienen celebrándose manifestaciones en protesta pol entamu de la única actividá taurina que s'organiza nel país entamada por Anadel col apoyu de coleutivos animalistes, asociaciones y partíos políticos, que nesta ocasión va celebrase'l domingu a les 16.30 hores con salida de la plazuela San Miguel y final na propia plaza de toros na xornada última de la Feria de Begoña.
